1Pe 2 | BOJ | STEP | Niŋgi ŋambile bunuj eb deqa niŋgi kumbra uge kalil uratiye. Gisaŋ anjam ti maqu kumbra ti are uge ti yomu anjam ti kalil di niŋgi torei uratekritiye.

1 Peter 2

Tamo Koba Yesus a tal aqa ai bul. Tal aqa ai di ŋambile unu

1 Niŋgi ŋambile bunuj eb deqa niŋgi kumbra uge kalil uratiye. Gisaŋ anjam ti maqu kumbra ti are uge ti yomu anjam ti kalil di niŋgi torei uratekritiye. 2 Iga qalie, aŋgro mom naŋgi muŋgum qaq uyqajqa qarnjreqnu. Dego kere niŋgi muŋgum qaq boledamu Qotei aqaq dena beqnu qaji di oqajqa are qaloqniye. Muŋgum qaq di agi Qotei aqa anjam. Muŋgum qaq di jiga bei saiqoji. Muŋgum qaq dena nuŋgo qunuŋ aqaryaiyimqa niŋgi tulaŋ boleosib siŋgilaqab. Yim Qotei na niŋgi oqas. 3 Tamo Koba Yesus aqa kumbra a niŋgi qa yeqnu qaji di niŋgi uyo oneiyonub deqa niŋgi qalieonub, Tamo Koba Yesus a tamo tulaŋ boledamu.

4 Tamo Koba Yesus a tal aqa ai bul siŋgila na tigelejunu. Tal aqa ai di ŋambile unu. Niŋgi tal aqa ai deq boiye. Tal aqa ai di tamo uŋgasari naŋgi na unsibqa uge qa marsib taqal waiyeb. Ariya Qotei na olo tal aqa ai di giltosiqa marej, “Tal aqa ai di tulaŋ boledamu.” 5 Niŋgi dego tal aqa ai bul ŋambile unub. Qotei na niŋgi aqa segi tal sqa marsiq deqa aqa Mondor aqa siŋgila na niŋgi gereiŋgeqnu. Yim niŋgi aqa segi atra tamo boledamu sosib Yesus Kristus aqa ñam na nuŋgo segi jejamu Qotei atraiyoqnib a niŋgi qa tulaŋ arearetoqnqajqa deqa.

6 Agi Qotei aqa anjam bei nami endegsib neŋgreŋyeb unu, “Niŋgi quiye. E na tal aqa ai qujai giltosim tal siŋgilatqajqa deqa tumaq di tigeltem unu. Tal aqa ai di tulaŋ bolequja. A siŋgila koba. E na Saion manaq dia tigeltem unu. Deqa tamo naŋgi tal aqa ai di osib naŋgo areqaloq di siŋgilateqnub qaji naŋgi jemainjrqasai.” 7 O was qu, niŋgi Kristus qa nuŋgo areqalo siŋgilateqnub deqa niŋgi mareqnub, “Tal aqa ai di tulaŋ bolequja.” Ariya tamo naŋgi Kristus qa naŋgo areqalo siŋgilato-saieqnub qaji naŋgi tal aqa ai di uge qa mareqnub. Agi Qotei aqa anjam bei nami endegsib neŋgreŋyeb unu,

“Tal gereiyo qaji tamo naŋgi na tal aqa ai di arqsibqa uge qa marsib taqal waiyeb. Onaqa tal aqa ai di Qotei na olo osiq tumaq di tigeltej unu.”
8 Qotei aqa anjam bei dego nami endegsib neŋgreŋyeb unu, “Tamo qudei naŋgi tal aqa ai di quraqyoqnsib maŋgaleqnub.” O was qu, tamo naŋgi di Qotei aqa anjam gotraŋyeqnub. Utru deqa naŋgi tal aqa ai di quraqyoqnsib maŋgaleqnub. Naŋgi kumbra uge uge yeqnub deqa Qotei na naŋgi padaltnjrqas. Qotei a nami naŋgi qa degsi marej.

9 Ariya Qotei na niŋgi giltŋgej deqa niŋgi aqa segi tamo uŋgasari tiŋtiŋ unub. Niŋgi aqa atra tamo dego sosib a ombla mandor kokba tigelejunub. Osib niŋgi aqa segi kumbra boleq di sosib walweleqnub. Niŋgi aqa segi tamo sqa marsiq giltŋgej deqa niŋgi aqa kumbra bole kalil deqa mare mare laqnub. Nami niŋgi ambruq di soqneb deqa Qotei na niŋgi metŋgonaqa niŋgi ambru uratosib suwaŋoq beleŋeb. Suwaŋ di tulaŋ bolequja. 10 Nami niŋgi tamo uŋgasari laŋaj soqneb. Ariya bini niŋgi Qotei aqa segi tamo uŋgasari unub. Nami Qotei a niŋgi qa are boleiyosaioqnej. Ariya bini a niŋgi qa are boleiyeqnu.

Iga Qotei aqa wau tamo sqom

11 O ijo kadoi bole, nuŋgo qure bole agi laŋ goge di unu. Deqa niŋgi mandamq endia yauŋ tamo bulosib unub. Deqa e na niŋgi endegsi merŋgwai. Niŋgi nami nuŋgo areqalo namij dauryqajqa are prugŋgoqnej. Ariya areqalo namij di nuŋgo qunuŋ ti ombla qoteqnub. Deqa niŋgi nuŋgo areqalo namij di uratosib qoreiyiye. 12 Bini niŋgi sawa bei bei qaji tamo naŋgo ambleq di sosib deqa niŋgi naŋgo ŋamgalaq dia kumbra bole bole dauryoqniye. Yimqa mondoŋ tamo uŋgasari peginjrqa batiamqa naŋgi nuŋgo kumbra bole di unsibqa naŋgo yomu anjam niŋgi qa maroqneb qaji di uratosib Qotei aqa ñam soqtoqnqab.

13 Niŋgi Tamo Koba Qotei qa are qaloqnsib deqa niŋgi tamo kokba ti sawa taqato qaji tamo naŋgi ti mandor kokba ti naŋgo anjam dauryoqniye. 14 Osib gate kokba naŋgo anjam dego niŋgi dauryoqniye. Gate kokba naŋgi agi mandor kokba naŋgi na wau enjreqnab giloqnsib tamo naŋgi kumbra uge uge yeqnub qaji naŋgi kamba awai uge enjreqnub. Osib tamo naŋgi kumbra bole bole yeqnub qaji naŋgo ñam olo soqtetnjreqnub. 15 Qotei aqa areqalo agiende. Niŋgi kumbra bole segi yoqnibqa nanari tamo niŋgi yomuiŋgeqnub qaji naŋgi nuŋgo kumbra bole di unsibqa naŋgo anjam uge di olo uratosib mequmesqab. 16 Bole, mandam tamo bei na niŋgi taqatŋgosaieqnu. Kristus a segi na niŋgi taqatŋgeqnu. Niŋgi degsib are qalsib walweloqniye. Ariya niŋgi endegsib are qalaib, “Mandam tamo bei na iga taqatgosaieqnu deqa uŋgum, iga kumbra uge yoqnqom.” Niŋgi degsib are qalaib. Niŋgi Qotei aqa wau tamo deqa niŋgi kumbra bole na walweloqniye. 17 Osib niŋgi tamo kalil naŋgi kumbra bole enjroqniye. Osib Qotei aqa tamo uŋgasari naŋgi qalaqala-injroqniye. Niŋgi Qotei ulaiyoqnsib aqa sorgomq di soqniye. Sosib mandor kokba naŋgo ñam soqtoqniye.

Iga Kristus aqa kumbra dauryoqnsim jaqatiŋ qoboiyoqnqom

18 O kaŋgal tamo, nuŋgo wau qa gate naŋgi na niŋgi taqatŋgoqnibqa niŋgi naŋgo sorgomq di sosibqa naŋgo anjam geregere dauryoqniye. Wau qa gate agi niŋgi kumbra bole eŋgeqnub qaji naŋgo anjam segi dauryoqnaib. Wau qa gate qudei niŋgi ugeugeiŋgeqnub qaji naŋgo sorgomq di dego soqniye. 19 Od, niŋgi Qotei qa ulaosib wauabqa nuŋgo wau qa gate naŋgi laŋa jaqatiŋ eŋgibqa di uŋgum. Niŋgi jaqatiŋ di qoboiyoqniye. Yimqa Qotei a nuŋgo kumbra deqa tulaŋ areboleboleiyoqnqas. 20 Ariya niŋgi kumbra uge yibqa nuŋgo wau qa gate naŋgi deqa niŋgi luŋgib niŋgi jaqatiŋ qoboiyqab di Qotei a niŋgi awai bole eŋgwasai. Ariya niŋgi kumbra bole yibqa nuŋgo wau qa gate naŋgi na olo niŋgi luŋgib niŋgi jaqatiŋ qoboiyqab di Qotei a nuŋgo kumbra deqa tulaŋ areboleboleiyqas.

21 Qotei a niŋgi kumbra degyqa osiqa niŋgi metŋgej. Di kiyaqa? Kristus a segi dego niŋgi aqaryaiŋgwa osiqa jaqatiŋ qoboiyosiq moiej. Niŋgi kamba aqa kumbra di dauryosib jaqatiŋ oqnsib sqajqa deqa are qalsiqa aqa kumbra di niŋgi osorŋgej. 22 Kristus a une bei yosaioqnej. Aqa medabu na gisaŋ anjam bei dego marosaioqnej. 23 Agi jeu tamo naŋgi na Kristus misiliŋ-yoqnsib anjam uge uge minjoqneb. Ariya a deqa kamba anjam uge bei naŋgi minjrosaioqnej. Naŋgi na Kristus jaqatiŋ koba yeqnab a deqa kamba naŋgi olo jaqatiŋ enjrqajqa marosaioqnej. A aqa segi jejamu osiqa Qotei aqa baŋq di uratej. Qotei agi tamo kalil naŋgi kumbra bole tiŋtiŋ na peginjreqnu qaji. 24 Kristus a gago une kalil qoboiyosiqa aqa segi jejamuq di atsiqa a ŋamburbasq di iga qa gaiŋej. Iga gago une kalil torei uratosim ŋambile sosim kumbra tiŋtiŋ yoqnqajqa deqa osiqa ŋamburbasq di iga qa gaiŋej. Jeu tamo naŋgi na Yesus qalougetosib jaqatiŋ koba yeb. Onaqa aqa jaqatiŋ dena a na iga olo boletgej.

25 Nami niŋgi kaja du du bul sosibqa nuŋgo segi areqalo na aleloqnsib laqneb. Ariya bini niŋgi olo Mandor Koba Yesus aqa areq bonub deqa a na nuŋgo qunuŋ geregere taqatejunu.